USA: Leta ya Texas yakuyeho kwambara agapfukamunwa n’andi mabwiriza yose yo kwirinda Coronavirus
Guhera mu cyumweru gitaha leta ya Texas izakuraho gusaba abantu kwambara agapfukamunwa ndetse yemerere ubucuruzi bwose kongera gukora bisesuye, nkuko Guverineri Greg Abbott yabitangaje.
Ku wa kabiri, uyu wo mu ishyaka ry’abarepubulikani yagize ati: “Ubu ni igihe cyo gufungura Texas 100%”.
Texas ni yo leta ya mbere ituwe cyane ikuyeho itegeko ryo kwambara agapfukamunwa.
Bwana Abbott amaze igihe anengwa n’abo mu ishyaka rye ku bijyanye n’agapfukamunwa, kari kagizwe itegeko kukambara guhera mu kwezi kwa karindwi mu 2020.
Ariko ubutegetsi bwa Perezida w’Amerika Joe Biden bwamenyesheje ko ingamba zo kwirinda coronavirus bikiri ngombwa kuzikurikiza.
Guverineri Abbott amaze igihe yotswa igitutu n’abo mu ishyaka rye ngo akureho ingamba zo kwirinda Covid-19
Ibyatangajwe muri Texas bije mu gihe amategeko nk’ayo yakuweho mu zindi leta zimwe, zirimo nka Michigan, Louisiana na Mississippi, nazo zakuyeho itegeko ryo kwambara agapfukamunwa.
Ibikorwa byo gukingira Covid-19 byongereye icyizere muri Amerika cyo gusubira mu buzima bwari buriho mbere yuko iki cyorezo cyaduka.
Ku wa kabiri, Perezida Biden yavuze ko Amerika iri mu nzira yuko bitarenze mu mpera y’ukwezi kwa gatanu izaba ifite inkingo zihagije kuri buri muntu mukuru uri mu gihugu.
Nyamara ariko iyi nkubiri yo kongera gufungura ubuzima bukaba nka mbere ya Covid-19 yateye ukutumvikana hagati y’ubutegetsi bwa Biden n’abategetsi bo hejuru bo mu rwego rw’ubuvuzi.
Abo bategetsi bo hejuru bo mu rwego rw’ubuvuzi bagaragaje guhangayikishwa no koroshya ingamba zo kwirinda coronavirus mu gihe iby’iki cyorezo bikidigadiga.
Ku wa mbere, umukuru w’ikigo cy’Amerika cyo kurwanya no kwirinda indwara (CDC) yaburiye ko “hashobora kubaho ubwiyongere ku nshuro ya kane bw’abandura” mu gihe iki gihugu cyaba kigize ukwirara.
Imibare ijyanye na Covid-19 igaragaza ko nubwo ubwandu n’impfu byagabanutse muri Amerika mu byumweru bya vuba aha bishize, ubwo bwandu n’impfu biracyari hejuru ugereranyije no mu bindi bihugu.
Muri Amerika abantu barenga miliyoni 28 banduye coronavirus, muri bo abarenga 516,000 yarabishe, nkuko imibare yakusanyijwe na Kaminuza ya Johns Hopkins ibigaragaza.
@igicumbinews.co.rw
